Mae Tŷ Pawb yn ganolfan ddiwylliannol sydd wedi ennill nifer o wobrau, ac sydd wedi’i lleoli yn yr hen ‘People’s Market’ yn Wrecsam. Rydym yn ofod ar gyfer cyfarfod, creu, chwarae, dysgu a masnachu. Gyda’n cymunedau, rydym yn rhannu orielau, stondinau marchnad, theatr, siopau, ardal fwyta, gardd ar y to ac ardaloedd cyhoeddus hyblyg.
Mae rhaglenni creadigol Tŷ Pawb yn rhoi bywyd i’w leoliad unigryw ac yn mynd i’r afael â materion brys byd-eang. Rydym yn gweithio gydag artistiaid a phartneriaid lleol, cenedlaethol a rhyngwladol i gynllunio, comisiynu a chyflwyno arddangosfeydd, prosiectau, perfformiadau a rhaglenni. Mae’r rhain yn galluogi ein cymunedau a’n hymwelwyr i fod yn ddefnyddwyr gweithredol o Dŷ Pawb.

Mae Tŷ Pawb yn lle lle mae croeso i bobl o bob oed, gallu a chefndir brofi, archwilio, mynegi a chyd-greu diwylliant ystyrlon a chynaliadwy.
Mae Tŷ Pawb yn rhan o Gyngor Wrecsam ac yn falch o gydweithio ag amrywiaeth o adrannau er mwyn sicrhau’r effaith fwyaf posibl i’n cymunedau. Mae ein gwaith yn cael ei gefnogi gan ddeddfwriaeth flaenllaw Cymru sy’n arwain y byd: y Ddyletswydd Digonolrwydd Chwarae a Deddf Llesiant Cenedlaethau’r Dyfodol.
Ers agor yn 2018, mae Tŷ Pawb wedi ennill cydnabyddiaeth ryngwladol fel enghraifft ragorol o sut y gellir plethu celf a bywyd â’i gilydd.

Cynlluniwyd yr ailddatblygiad gan Sarah Featherstone o Featherstone Young.

Mae cyfleusterau Tŷ Pawb yn cynnwys dwy oriel, theatr/gofod perfformio, sawl ystafell gyfarfod, bar a chwrt bwyd a neuadd farchnad sy’n gartref i bron i 30 o fusnesau annibynnol lleol.