Mae wyth o atyniadau mwyaf poblogaidd ac unigryw Wrecsam wedi dod ynghyd mewn menter ar y cyd newydd sydd wedi’i chynllunio i arddangos y gorau oll sydd gan y fwrdeistref sirol i’w gynnig.
Mae’r cydweithrediad yn dod â chymysgedd amrywiol o dreftadaeth, diwylliant, gwyddoniaeth ac atyniadau naturiol ynghyd i greu llwybr ymwelwyr hawdd ei ddilyn, sy’n addas i deuluoedd ac yn annog trigolion ac ymwelwyr i archwilio, cysylltu a darganfod Wrecsam mewn ffordd newydd.
Mae’r llwybr yn tynnu sylw at wyth lleoliad hanfodol ar draws yr ardal, gan arwain ymwelwyr ar daith sy’n ymestyn dros 314 miliwn o flynyddoedd o hanes — o goedwigoedd ffosiledig hynafol a threftadaeth ddiwydiannol i ddiwylliant modern, creadigrwydd, arloesedd, gwyddoniaeth a’r dyfodol rydym yn ei adeiladu heddiw.
Wyth o atyniadau gorau Wrecsam
Mae’r atyniadau sy’n cymryd rhan yn cynnwys:
Stori Brymbo (yn agor Mehefin 2026)
Xplore! Science Discovery Centre
Amgueddfa Pêl-droed Cymru ac Amgueddfa Wrecsam (opening 2026)
Traphont Ddŵr a Chanolfan Ymwelwyr Pontcysyllte
Hefyd wedi’u cynnwys mae marchnadoedd Wrecsam sydd wedi ennill sawl gwobr, canolfan gelfyddydau a chymunedol, a chartref Canolfan Ymwelwyr Wrecsam, Tŷ Pawb.
Anogir ymwelwyr i ddilyn y llwybr darluniadol, archwilio pob safle a chymryd rhan mewn profiadau rhyngweithiol ar hyd y daith, gan gasglu sticeri ym mhob safle i gyfoethogi’r profiad.
‘Taflu goleuni’ ar yr hyn sydd gan Wrecsam i’w gynnig
Dywedodd y Cynghorydd Nigel Williams, Aelod Arweiniol dros yr Economi, Busnes a Thwristiaeth:
“Mae This is Wrecsam, partneriaeth gyrchfan swyddogol Wrecsam, yn bwysig gan nad yw’n cael ei arwain gan y cyngor ond ei fod yn cael ei gefnogi ganddo. Mae hyn yn rhoi’r rhyddid i’r aelodau gydweithio a chanolbwyntio ar wella profiadau cwsmeriaid.
Rwy’n falch iawn o weld is-grŵp yr Atyniadau Ymwelwyr yn cymryd y fenter ac yn lansio’r Llwybr hwn. Mae’n ffordd ffres o arddangos yr amrywiaeth o brofiadau atyniadau ymwelwyr sydd ar gael ar draws Sir Wrecsam a’u straeon cysylltiedig.
Mae gan Wrecsam lawer i’w gynnig i bobl leol ac i’r rhai sy’n ymweld i archwilio.”
Wrecsam yn ‘tyfu fel cyrchfan ddiwylliannol’
Dywedodd Paul Roberts, Aelod Arweiniol dros Bartneriaethau a Diogelwch Cymunedol CBSW: “Mae Wrecsam yn cofleidio’r celfyddydau a diwylliant, ac mae prosiectau cydweithredol i gysylltu ein hatyniadau lleol ar hyn o bryd yn dyst i bŵer partneriaethau o fewn ein dinas ffyniannus. Mae’r arwyddion clir a’r traws-hyrwyddo o atyniadau’r rhanbarth yn gwella profiad yr ymwelwyr. Gyda disgwyl cynyddol am ein hamgueddfa newydd ac atyniadau wedi’u hadnewyddu; ynghyd ag ymholiadau cynyddol gan y rhai sy’n ceisio arosiadau hirach yn y rhanbarth; rydym yn disgwyl denu cynulleidfaoedd ehangach i Wrecsam eleni.”
Dywedodd yr Aelod Arweiniol sydd â chyfrifoldeb am Tŷ Pawb a Dinas Diwylliant, y Cynghorydd Hugh Jones: “Mae safon ac amrywiaeth yr atyniadau ar y llwybr yn enghraifft ddisglair o sut mae Wrecsam yn tyfu fel cyrchfan ddiwylliannol gyfoethog ac unigryw – mae dau o’r atyniadau a restrir yn newydd sbon, yn agor eleni. Rydym wrth ein bodd yn gweld Tŷ Pawb yn rhan o restr mor aruthrol o atyniadau. Bydd y llwybr yn ganllaw rhagorol i ymwelwyr, gan ddarparu syniadau gwych ar gyfer archwilio ein sir.”
Bydd y llwybr yn cael ei lansio’n swyddogol ar 1 Mai, gyda mapiau ar gael ar draws y safleoedd sy’n cymryd rhan ac yng Nghanolfan Gwybodaeth i Ymwelwyr Wrecsam, yn ogystal ag ar-lein.
Am ragor o wybodaeth, ewch i: www.wrexhamattractions.co.uk